Бројот на невработени лица во јуни изнесува 340.776 и е за 6.846 лица помалку споредено со јуни, објави денеска Агенцијата за вработување. Во јуни бројот на невработени лица изнесувал 347.622.
Според податоците на Агенцијата најголемиот број од лицата кои се регистрирани како невработени во јули, односно 20,1% или 68.221 лице се изјасниле дека се пријавуваат само за остварување на правото на здравствено осигурувње, а 271.555 лица активно бараат работа.
“Намалувањето на бројот на евидентирани невработени лица во месец јули 2009 година во најголем дел, се должи на спроведувањето на активните мерки предвидени во Оперативниот план за активни програми и мерки за вработување за 2009 година, согласно Програмата за работа на Владата, односно организирање јавни работи, субвенционирање на вработување” се вели во соопштението од Агенцијата.
Најмногу лица бараат работа во Скопје, по што следат Тетово, Куманово, Прилеп, Битола.
Според староста најмногу од невработените се на возраст од 25 до 29 години, а според степенот на образование најмногу меѓу невработените се ниски квалификации.
Во целиот свет, како последица на кризата, досега милиони лица ја изгубија работата. Според најцрните прогнози на Меѓународната организација на трудот, до крајот на годинава 50 милиони луѓе ќе останат без работа, а 200 милиони ќе паднат во сиромаштија. Наспроти овие глобални текови, во Македонија има обратен процес - паѓа невработеноста.
(Tотал)