Основниот суд Скопје 2 закажа рочиште за 18 јануари за да се отвори стечајна постапка за авиокомпанијата Македонски аеротранспорт- МАТ. Авиокомпанијата годинава го загуби статусот на редовен авиопревозник, а воздухопловните власти неколкупати го приземјуваа нејзиниот единствен авион поради долговите, но и поради технички проблеми. На МАТ му беше забрането да лета кон Италија и кон Германија поради долгови кон тамошните аеродроми и воздухопловни власти.
Иницијативата за стечај ја поднесе Агенцијата за цивилно воздухопловство за да го наплати долгот околу 3 милиони евра, а ист износ од МАТ побаруваат и македонските аеродроми. Компанијата има долгови и кон европската агенција „Еуроконтрол“.
На единствениот национален превозник во септември му истече и рокот за продолжување на лиценцата за летање. Со тоа, паднаа во вода преговорите со Туркиш ерлајнс и со ЈАТ за преземање на МАТ.
Голем дел од вработените во МАТ ги презеде новоформираната компанија МАТ ервејс, кој неодамна ја презеде српскиот туроператор „Контики“.
(Дневник)