Хрватите, во првите девет месеци од оваа година, во сите облици на трговија, остварија 15% помал промет во споредба со истиот период минатата година, со што нивниот приход е намален за 33,6 милијарди куни (4,6 милијарди евра), соопшти хрватскиот Државен завод за статистика.
Падот на прометот се зголемувал од месец во месец, а од шестмесечниот до деветомесечниот извештај се зголемил за 13,6 милијарди куни.
Трговците сепак се надеваат дека овој месец ќе биде подобро и дека овогодишниот промет во декември ќе ги достигне минатогодишните 12 милијарди куни.
Вредносно најголем пад во прометот почувствуваа трговците со моторни возила, кои забележаа намалување на продажбата и на големо и на мало за 36,8%.
Прометот на моторните возила во првите три квартали минатата година изнесуваше 20,74 милијарди куни, додека во истиот период оваа година достигна околу 12 милијарди куни.
Експертите проценуваат дека прометот ќе продолжи да паѓа и во првата половина следната година, при што најголемиот пад би можел да биде регистриран на почетокот на годината. Помало опоравување би можело да се очекува во текот на пролетта, но тоа пред се би било последица на владините мерки за поттикнување на домашната потрошувачка.
(Toтал)