Туроператорите и туристички агенции кои во 2010 година ќе донесат странски туристи во Македонија ќе добијат субвенции од државата. Согласно Законот за туристичка дејност, од 1 јануари ќе стапи во сила упатството од министерот за економија за субвенционирање на дел од трошоците за остварени организирани туристички воздушен, патен и железнички превоз.
Според упатството, субвенција можат да остварат организатори на пакет аранжмани за странски гости кои во Македонија ќе реализираат три ноќевања со појадок во категоризирани објекти. Субвенција ќе се обезбедува и за организиран групен превоз со закупени автобуси, авиони или закупени минимум десет места во воз од местото на поаѓање на групата до местото на користење на услугата во сместувачкиот објект и враќање на групата на иста релација.
Туроператорите и туристичките агенции од земјава апликациите за користење субвенции ќе ги доставуваат до Министерството за економија со придружна документација во која ќе бидат содржани потврдите за закуп на сместувачки капацитети, сметки за извршена услуга за исхрана, затворената листа на патници и други потребни образци во зависност од видот на услугата.
Субвенцијата за закупен автобус со патници кои доаѓаат од Албанија, Бугарија, Србија, Грција, Црна Гора, Босна и Херцеговина изнесува 10 евра по патник, а за туристи од Турција, Романија, Унгарија, Словенија и Хрватска - 15 евра по патник. За туристи од другите европски земји, субвенцијата изнесува 20 евра по патник.
Субвенцијата за авионски превоз по остварен патник од европските дестинации изнесува 25 евра додека од интерконтиненталните дестинации - 45 евра. За железничкиот превоз висината на субвенцијата изнесува 15 евра по донесен патник. За комбиниран превоз кај кого при доаѓање во дестинацијата се користи авиопревоз, висината на субвенцијата изнесува по 15 евра по донесен патник.
Во упатството за субвенционирање на странски организиран туристички промет што стапува на сила од 1 јануари 2010 година, прецизирани се и роковите за поднесување на барањата за субвенции.
(Тотал)