Кабелскиот оепратор Кејбелтел од октомври ја зголемува понудата на аналогни и дигитални канали, најавува старт и на фиксна телефонија, но и зголемување на цената за нивните услуги за 100 денари.
На денешната прес-конференција извршниот директор на компаниајта Џефри Ален Финли и оперативниот директор Стојан Ѓоргоски истакнаа дека од 1 октомври Кејбелтел се декларира како повеќекратен сервис оператор, кој ќе обезбедува Трипл плеј услуга (видео, интернет и телефонија) за корисниците во Скопје, Куманово, Тетово, Велес и Штип.
Покрај ова тие информираа дека ќе се прошири видео понудата со зголемување на аналогните канали на 65 и обезбедување на 70 нови дигитални канали во Скопје и 55 дигитални канали во Штип. Тие очекуваат дигитални канали да имаат нивните корисници до крајот на 2008 година во Куманово и Велес, а во првите три месеци од наредната година во Тетово.
“Наредниот месец ќе ги лансираме нашите телефонски услуги, како и повиците во мрежата на Кејбелтел кои за нашите претплатници ќе бидат бесплатни”, потенцираат Финли.
Ќе може да се изберат повеќе пакети со бесплатни импулси. Цените, како што потенцираат од компанијата, ќе бидат достапни за секој граѓанин, а пакетите ќе бидат адаптирани на потребите на корисниците.
Зголемувањето на цената за 100 денари, тој ја оправда, со можноста корисниците да ги заштедат преку новите дабл и трипл плеј пакети.
За да се овозможат овие услуги, компанијата, како што информираа на прес-конференцијата, инвестирала дополнителни пет милиони евра во надградба на мрежата во подружниците со цел да се обезбедат трипл плеј услугите - видео, интернет и телефонија. Овие средства се искористени за надградба на мрежата и купување на нова интернет опрема со цел да се подобри квалитетот на услугите.
(Тотал)